УИХ-ын гишүүн Б.Жаргалмаагаар ахлуулсан ажлын хэсэг өндөр настны, хөгжлийн бэрхшээлтэй ирдэгийн асрамжийн газрын үйл ажиллагаатай танилцлаа | Мэдээллийн дэлгэрэнгүй

1

Улсын Их Хурлын Нийгмийн бодлогын байнгын хорооноос Ахмад настны тухай, Нийгмийн халамжийн тухай хуулийн хэрэгжилтийг хянан шалгах, ахмад настны асрамжийн газрын үйл ажиллагаатай танилцах үүрэг бүхий ажлын хэсгийг өнгөрсөн нэгдүгээр сард байгуулсан. Ажлын хэсгийн гишүүд өнөөдөр /2022.02.10/ Ватиканы төлөөлөгчийн газрын харьяа эмэгтэйчүүдийн ахмад настны “Тереза эх” асрамжийн төв, “Батгэрэлт-ирээдүй” ТББ-ын хөгжлийн бэрхшээлтэй иргэдийн асрамжийн төвийн үйл ажиллагаатай танилцаж, газар дээр зарим асуудлыг шийдвэрлэн ажиллав.

Сүхбаатар дүүргийн 16-р хороонд байрлах Ватиканы төлөөлөгчийн газрын харьяа эмэгтэйчүүдийн ахмад настны асрамжийн төв нь 2011 оноос эхлэн үйл ажиллагаагаа явуулж буй.  Тус асрамжийн төвд өнөөдрийн байдлаар 21 ахмад настан байгаа аж. Жилдээ дунджаар 80 гаруй хүн асруулдаг байна. Түүнчлэн тус төвийнхөн гэртээ байгаа асаргаа сувилгаа хэрэгтэй 1000 гаруй хүнд жил бүр хүмүүнлэгийн тусламж үзүүлдэг байна. Байрны хүрэлцээ муу учраас том байртай болчихвол олон хүнд тусламж үйлчилгээ үзүүлэх бүрэн боломжтой гэдгийг тус төвийн менежер ярьж байлаа.

“Тереза эх” асрамжийн төвийн менежер Б.Урантуул “Манайх дэлхийн 134 оронд хүмүүнлэгийн чиглэлээр үйл ажиллагаа явуулдаг байгууллагын салбар. Ватиканы төлөөлөгчийн газраас анх Монгол Улсад урьж оруулж ирсэн. Бид Монгол Улсаас ямар нэгэн дэмжлэг тусламж авдаггүй.  Бидэнд санхүүжилт гэхээсээ хороо, дүүрэг, шат шатны эмнэлэгийн хамтын ажиллагаа, уялдаа холбоо маш чухал байна. Эрүүл мэндийн болоод иргэдийг бичиг баримтжуулах зэрэг үйлчилгээ хүндрэлтэй байдаг. Бичиг баримтгүй хүмүүс их ирдэг. Энэ хүмүүс эрүүл мэндийн тусламж үйлчилгээ авах боломжгүй байдаг. Тиймээс хувийн эмнэлэгт очих шаардлага гардаг. Нэг иргэнийг бичиг баримтжуулах гээд гурван жил хөөцөлдөж байна” хэмээв.

УИХ-ын гишүүн, ажлын хэсгийн ахлагч Б.Жаргалмаа “Төрийн үйлчилгээг төрийн өмнөөс иргэдэд үзүүлж байгаа учраас төрөөс тодорхой хэмжээний дэмжлэг үзүүлэх ёстой. Эрүүл мэндийн тусламж үйлчилгээ үзүүлэх боломжийг нээж өгөх, иргэдийг бичиг баримтжуулах тухайд анхааран ажиллах шаардлагатай байна. Хууль хэдий хангалттай байгаа ч хэрэгжих шатандаа хангалтгүй байна гэж үзэж байна. Эрүүл  мэнд, бүртгэл, нийгмийн даатгал зэрэг байгууллагауудын ажлын уялдаа холбоо хангалтгүй байна. Харж хандах хүнгүй, иргэний бүртгэлгүй иргэд ихээр ирдэг гэж байна. Цаашид эдгээр асуудлуудыг цэгцэлж, хуульд нэмэлт, өөрчлөлт оруулахаар ажиллах болно” гэв.

Үүний дараа Сонгинохайрхан дүүрэгт үйл ажиллагаа явуулдаг “Батгэрэлт-ирээдүй” ТББ-ын хөгжлийн бэрхшээлтэй иргэдийн асрамжийн төвийн үйл ажиллагаатай танилцлаа. Энэ төвд 17-94 насны 58 хүн байдаг аж. Анх 2009 онд үйл ажиллагаагаа эхлүүлж ахмад настнуудад асрамжийн үйлчилгээ үзүүлж байгаад 2011 онд Хөдөлмөр, халамж үйлчилгээний газартай хамтран ажиллах гэрээ байгуулж, Батсүмбэр дэх улсын асрамжийн газрааас 15 хөгжлийн бэрхшээлтэй иргэнийг авч асарснаар хөгжлийн бэрхшээлтэй иргэдийн төрөлжсөн асрамжийн үйлчигээгээ эхлүүлсэн байна. Тус газрын захирал Н.Роза “Манай асрамжийн газрын байр түрээсийнх. Өөрсдийн байртай болох үүднээс Сонгинохайрхан дүүрэг Тахилтад газар авч барилгын зураг төсөл гаргуулсан. Одоо барилгаа барихад олон улсын байгууллага, төсөл хөтөлбөрт хамрагдахаас гадна төрийн дэмжлэг хэрэгтэй болоод байна. Мөн хөнгөлттэй эм бичих эрх гаргуулах, эмч сувилагч, асрагч нараа төрийн албаныханта адилаар тэтгэвэрт гарахад буцалтгүй тусламж авдаг болгох тал дээр анхаармаар байна” хэмээн тулгамдсан асуудлуудаа ярьж байв.

НХХЯ-ны Төрийн нарийн бичгийн дарга Г.Өнөрбаяр “Дүүрэг бүрт нэг асрамжийн газар хэрэгтэй байна. Цаашдаа дүүрэг бүр асрамжийн төв байгуулааад түүнийгээ хувийн хэвшилд түншлэлээр шилжүүлээд явбал зөв гэж хардаг. Эмч нарын асуудал бол хамгийн тулгамдсан чухал асуудлуудын нэг. Асрамж, халамжийн үйлчилгээ үзүүлж байгаа газруудад төрөөс хувьсах зардал олгож байгаа боловч хүнд хүмүүстэй ажилладаг учраас  ажиллаж сонирхолтой хүмүүс маш бага байдаг. Тиймээс нийгмийн асуудлыг нь шийдэж өгснөөр ажиллах хүч татах нэг хөшүүрэг. Үүнийг ажлын хэсэг ярилцаад гарц шийдэл олж болох асуудал гэж бодож байна” хэмээв.

Мөн Эрүүл мэндийн яамнаас тус асрамжийн газрын эмчид нь хөнгөлөлттэй эм бичих эрхийг үүсгэн өгч асуудлыг газар дээр нь шийдвэрлэлээ. Ингэснээр хөгжлийн бэрхшээлтэй иргэд эмээ бичүүлэхийн тулд заавал харьяа хороо дүүрэг рүүгээ явах шаардлагагүй болж байгаа юм.

УИХ-ын гишүүн Д.Сарангэрэл “Асрамжийн газруудад гол тулгамдаж буй асуудал нь байрны асуудал байна. Мөн өвчлөл ихтэй байдаг учраас энд ажиллаж байгаа эмч нарт хөнгөлөлттэй эм бичих эрхийг нээж өгөх нь нэн чухал. Түүнчлэн ажиллах нөхцөл хүнд учраас энд ажиллаж байгаа хүмүүст тодорхой хэмжээний дэмжлэг тусламж үзүүлдэг байх шаардлагатай. Эдгээр асуудлуудыг шийдэхийн тулд энэ ажлын хэсэг тодорхой шийдвэр, зөвлөмж гаргаад явна” гэлээ хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

 

 





УИХ

0 0 санал
Мэдээг үнэлэх
guest
1 Сэтгэгдэл
Хамгийн сүүлийн үеийн
Хуучнаас Хамгийн олон санал өгсөн
Шугаман санал хүсэлт
Бүх сэтгэгдлийг үзэх
trackback
УИХ-ын гишүүн Б.Жаргалмаагаар ахлуулсан ажлын хэсэг өндөр настны, хөгжлийн бэрхшээлтэй ирдэгийн асрамжийн газрын үйл ажиллагаатай танилц
3 сарын өмнө

[…] Source link […]

1
0
Таны санал бодол сэтгэгдлээ бичих үү?x
()
x